Gemeentes maak hul harte en beursies oop vir droogtehulp
Wes Transvaal se gemeentes het vir twee Sondae ‘n spesiale deurkollekte gehou vir hulle droogtefonds om boere in nood te help in die gebied van ons Sinode.
Die gemeentes het wonderlik gereageer en daarom kon ons op 8 Maart die oggend by Agri Noordwes se vergadering R 500 000,00 solank aan hulle oorbetaal.
Die geld gaan gebruik word om die boere wat die grootste nood het te help.
Agri en TLU kan voer gratis geskenk kry en dan gebruik hulle die geld om vragmotors te huur om die voer aan te ry.
Op die foto: Ds. Johan Brink (Assessor van Wes Transvaal Sinode en Voorsitter van hulle Sinodale Fondsekommissie) oorhandig die tjek van R 500 000,00 aan Mnr. Pierre Vercueil, President van Agri NW, terwyl Mnr. Boeta du Toit, Uitvoerende Hoofbestuurder van Agri NW toekyk. Dit was ‘n emosionele oomblik vir almal om die groot dankbaarheid van die boere te ervaar. Van die boere het onder baie trane vertel hoe dit in hulle omgewing gaan en veral hoe die diere honger ly.